Wé zin “ De Tatermenkes “, dat zin Joop Janssen en Henk Goossens. Twjè luuj die hun spaore höbbe verdeend achter de scherme bie de Steinder Revuu. Joop waor jaore lang penningmeister en maak noe nog dei loet van de sponsorcommissie. Henk waor jaore lang verantwoordelik veur de techniek bie de Steinder Revuu.
Mèr oug luuj van achter de scherme wille waal êns oetblinke op de bühne. Die kans deeg zich veur wie V.V. “ de Steinder Bök ” in 2007 ’t jèste Steinder Vasteloaves Konkoer (SVK) opstarde. Henk hauw in ’t verlede op zanggebied al flink gèt ervaring op gedaon bie LPG ( Lig Politiek Getind ). Joop is eine man mit völ ervaring in ’t managment en geveul veur samehorigheid, dus same staoke de köp bieein en beslaote om mit te doon aan ’t leedjes konkoer. Zie wolle doamit de Steinder Bök ongersteunne in hun actie om get nuuts veur Stein op vastelaoves gebied te introduseere. Eigelik waor ‘t niks nuuts mèr get wat vreuger al ens waor gewès en weer opnuuj laeve woor ingeblaose.
Henk bedag de tekst veur hun 1e leedje “ De Taterstein ”. Veur höm eine nostagische greep want de Taterstein , dae onger in auwt Stein steit, waor veur de luuj aan de Brök ’t symbool van vastelaovend viere. Ein centraal herkѐnningspunt veur die luuj die mit de vasteloavend aafsletend altied de Stein bezônge. Dus maakde Henk ein nuuj vaselaoves versie euver dae Taterstein.
Same troake ze nao de Studio van Jean Janssen oet Uermend om ein sjwaon arrangement en ein leuke opnaame te make en dat lökde. De ellefde van de ellefde 2007 waor ’t dan zwa wiet ’t leedje woor gebrag en hieel toepasselik hauwe zie aug de hunne artieste naam opgedrage aan dae Stein. Zie nömde zich de Tatermenkes.
’T Leedje sloog in en zie haolde de jèste pries van ’t jèste SLVK. Onverwachs en door hun gaar neet bedoeld kreege zie in ’t Steinse völ verzeuke om op te traeje. Dat höbbe zie dan aug gedaon, mè om hun optraeje toch get boddy te gaeve maakde zie nog gauw ein populair leedje debie. Gooie Moggel, get oet de reclame waereld wat zie nao ’t Steins höbbe omvertaald. 2007 waor veur hun dan auch eine sjwaone vasteloavestied, gèt wat ze neet hauwe wille misse.
De Steinder Revuu is veur Joop en Henk altied eine drökke tied en de êllefde van de êllefde vilt dao aug altied midde in. Gezeen ’t succes van 2007 ze waore de winnaars van ’t 1e SLVK, veulde zie zich tog verplich om mit te doon aan de editie van 2008.
Ongertössje hauw zich Wim de broor van Henk gemèljd dat hae oug waal ein vastelaovesleedje veur hun wol sjrieve. Wim hauw dat dèkker gedaon dènk mer ens aan Laot de R mer Rolle dat kaom van zien henjd. Hae fisternölde op ein familliefésjke midde in de zomer in Zoetermeer ’t refrein en de melode in ein van “ Laot mer Loupe ”, òm ’t daonao nog ein paar maond te laote ligge, mèr tog nog optied bie Jean Janssen aaf te levere om d’r eine leuke vastelaoves slager van te maake.
Joop en Henk hauwe aug neet stil gezeate en waore op zeuk gegange nao meziek en waore aan ’t tekste breije geslage.
Mit nog get hulp zwa links en rechs höbbe zie oeteindelik in het jaor 2008 nog get leedjes gemaakt.De totale productie van hun waor anno februari 2009 zoamèr zös leedjes allemaol gearrangeerd en opgenômme bie Jean Janssen.
Ôm ’t verhaol neet al te lank te make slaon v’r ein aantal jaore euver en zin inmiddels in 2014 belendj en is ’t euvre van de Tatermenkes opgeloupe tot 35 leedjes. Kiek mer es wiejer op dees site dan zeet geer ein euverzich van al de leedjes en tekste. Dat is tot stand gekomme door de mitwirking van völ luuj en alles is opgenômme en gearangeerd door Jean Janssen. De meiste tekste zin geschreve door Joop en Henk, mèr oug door Wim Goossens, Jan Ridderbeecks en Jac Stel.
’T Repertwoar is momenteel ongerverdeild in 3 groepe:
Door de oetbreiding van ’t repertwoar zin zie gemèkkelik in staot om ein programma aan te beeje van 1,5 tot 2 oer. Hun optraijes zin allang neet mje allein ’t vastelaoves podium. Zie zin gaer gezinne gaste bie verschillende gelaegeheden. Oug bie de verzorgingshoeze zin zie kindj aan hoes en entertaine dao de bewoners.
